ନୂଆଦିଲ୍ଲୀ,୨୦।୫: ମଦ୍ରାସାରେ ଶୁଣିବାକୁ ମିଳିବ ଭାରତୀୟ ସେନାର ପରାକ୍ରମ। ‘ଅପରେସନ୍ ସିନ୍ଦୂର‘ର ପୁରା ଘଟଣାବଳୀ ଛାତ୍ରଙ୍କୁ ପଢାଇବେ ମୌଲାନା।କାରଣ ଉତ୍ତରାଖଣ୍ଡ ସରକାର ‘ଅପରେସନ୍ ସିନ୍ଦୂର’କୁ ମଦ୍ରାସା ପାଠ୍ୟକ୍ରମରେ ସାମିଲ କରିବାର ନେଇଛନ୍ତି ଐତିହାସିକ ନିଷ୍ପତ୍ତି।
ଉତ୍ତରାଖଣ୍ଡର ପୁଷ୍କର ସିଂହ ଧାମି ସରକାରଙ୍କ ବଡ଼ ନିଷ୍ପତ୍ତି। ଏବେ ରାଜ୍ୟର ସମସ୍ତ ମଦ୍ରାସାରେ ପଢାଯିବ 'ଅପରେସନ୍ ସିନ୍ଦୂର'ର କାହାଣୀ । ଯାହା ଦ୍ଵାରା ଛାତ୍ରଛାତ୍ରୀମାନେ ଭାରତୀୟ ସେନାର ସାହସିକତା ଏବଂ ଦେଶପ୍ରେମକୁ ବୁଝିପାରିବେ। ଇଣ୍ଟର ମିଡିଏଟ୍ ସ୍ତରର ନୂତନ ପାଠ୍ୟକ୍ରମରେ 'ଅପରେସନ୍ ସିନ୍ଦୂର' ଉପରେ ଏକ ସମ୍ପୂର୍ଣ୍ଣ ଅଧ୍ୟାୟ ଯୋଡାଯିବ। ରାଜ୍ୟର ୪୫୧ଟି ପଞ୍ଜିକୃତ ମଦ୍ରାସାରେ ବର୍ତ୍ତମାନ ୫୦ ହଜାରରୁ ଅଧିକ ଛାତ୍ର ଅଧ୍ୟୟନ କରୁଛନ୍ତି। ଯେଉଁମାନେ କି ଏହି ନୂତନ ପଦକ୍ଷେପ ଅନୁସାରେ ଦେଶପ୍ରେମର ଇତିହାସ ସହିତ ପରିଚିତ ହେବେ।
ସରକାରଙ୍କ ଏହି ପଦକ୍ଷେପକୁ ଶିକ୍ଷା ସହିତ ଜାତୀୟତାବାଦ ଏବଂ ସାମରିକ ଗୌରବକୁ ଯୋଡ଼ିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପ୍ରୟାସ ବୋଲି ବିବେଚନା କରାଯାଉଛି। ଏନେଇ ଉତ୍ତରାଖଣ୍ଡ ମଦ୍ରାସା ବୋର୍ଡର ଅଧ୍ୟକ୍ଷ ମୁଫତି ଶମୁନ କାସମୀ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କୁ ଭେଟିଛନ୍ତି। ସେ କହିଛନ୍ତି, ଉତ୍ତରାଖଣ୍ଡ ବୀରଙ୍କ ଭୂମି। ପିଲାଙ୍କୁ ଏହି ପାଠ୍ୟକ୍ରମ ଦ୍ବାରା ଦେଶଭକ୍ତିର ଭାବନା ସହ ଓତପ୍ରୋତ ଭାବରେ ଜଡିତ କରିହେବ।
